ഓട്ടവ: കാനഡയിലെ ജനസംഖ്യാ വളർച്ച രണ്ടാം പാദത്തിൽ നിശ്ചലാവസ്ഥയിൽ ആയതായി സ്റ്റാറ്റിസ്റ്റിക്സ് കാനഡ. ഏപ്രിൽ ഒന്ന് മുതൽ ജൂലൈ ഒന്ന് വരെ രാജ്യത്തിൻ്റെ ജനസംഖ്യ വെറും 0.1 ശതമാനം മാത്രമാണ് ഉയർന്നത്. 47,098 പേരാണ് ഈ കാലയളവിൽ ജനസംഖ്യയുടെ ഭാഗമായത്. 1946 മുതൽ രണ്ടാമത്തെ പാദത്തിൽ രേഖപ്പെടുത്തിയ ഏറ്റവും താഴ്ന്ന വളർച്ചാ നിരക്കാണിത്. ജനസംഖ്യാ വർധന മന്ദഗതിയിൽ എത്തിയതിന് പ്രധാന കാരണം താൽക്കാലിക താമസക്കാർ (Non-permanent residents) രാജ്യത്ത് നിന്ന് വലിയ തോതിൽ പുറത്ത് പോയതാണ്. രണ്ടാം പാദത്തിൽ മാത്രം 58,719 പേർ കാനഡ വിട്ടു — 1971 മുതൽ (പാൻഡമിക് കാലഘട്ടം ഒഴികെ) രേഖപ്പെടുത്തിയ ഏറ്റവും വലിയ ത്രൈമാസ ഇടിവാണിത്.
2024-ൽ ഫെഡറൽ സർക്കാർ നടപ്പാക്കിയ ഇമ്മിഗ്രേഷൻ നയത്തിലെ കർശന നിയന്ത്രണങ്ങളാണ് ഇതിന് കാരണം. താൽക്കാലിക വിദേശ തൊഴിലാളികളുടെ എണ്ണം കുറയ്ക്കുക, കുറഞ്ഞ വേതനത്തിലുള്ള തൊഴിലാളികളുടെ നിയമനം നിയന്ത്രിക്കുക, സ്റ്റഡി പെർമിറ്റ് അനുവദിക്കുന്നത് ഗണ്യമായി കുറയ്ക്കുക എന്നിവയാണ് പ്രധാന നടപടികൾ.
