കാനഡയിലുടനീളം ഇൻഫ്ലുവൻസ കേസുകളിൽ വർധന ഉണ്ടായതായി ഹെൽത്ത് കാനഡ റിപ്പോർട്ട് ചെയ്തു. ഫ്ലൂ പരിശോധനകളുടെ പോസിറ്റിവിറ്റി നിരക്ക് 8.1 ശതമാനമായി ഉയർന്നു. കഴിഞ്ഞ ആഴ്ച 1,394 ഫ്ലൂ കേസുകൾ റിപ്പോർട്ട് ചെയ്തതായി ഏജൻസി അറിയിച്ചു. ഏറ്റവും കൂടുതൽ ഇൻഫ്ലുവൻസ ബാധിച്ചിരിക്കുന്നത് 65 വയസ്സിനു മുകളിലുള്ളവരെയാണ്.

വളണ്ടിയർ ഹെൽത്ത് സർവൈലൻസ് പ്രോഗ്രാമായ ഫ്ലൂ വാച്ചേഴ്‌സ് അനുസരിച്ച്, 9,525 പേരിൽ 1.4 ശതമാനം പേർക്ക് ചുമയും പനിയും അനുഭവപ്പെടുന്നതായി റിപ്പോർട്ട് ചെയ്തു. കാനഡയിൽ ഈ സമയത്ത് രോഗബാധിതരുടെ എണ്ണം വർധിക്കുന്നത് സാധാരണമാണെന്ന് പകർച്ചവ്യാധി വിദഗ്ധനായ ഡോ. ഐസക് ബൊഗോച്ച് പറഞ്ഞു. ഇൻഫ്ലുവൻസ വൈറസിന്റെ മൂന്ന് സ്ട്രെയിനുകൾ രണ്ട് ഇൻഫ്ലുവൻസ എ സ്ട്രെയിനുകളും (H3N2, H1N1) ഒരു ഇൻഫ്ലുവൻസ ബി സ്ട്രെയിനും നിലവിൽ പ്രചരിക്കുന്നതായി ബൊഗോച്ച് വ്യക്തമാക്കി. കൂടാതെ രോഗ പ്രതിരോധത്തിനായി ഫ്ലൂ ഷോട്ടുകൾ എടുക്കണമെന്നും അദ്ദേഹം നിർദ്ദേശിച്ചു.