കാനഡയിലെ ഫെഡറൽ മേഖലയിൽ ജോലി ചെയ്യുന്ന തൊഴിലാളികളുടെ കുറഞ്ഞ വേതനം വർധിപ്പിച്ച് എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ ഉത്തരവിറക്കി. രാജ്യത്തെ മാറുന്ന സാമ്പത്തിക സാഹചര്യങ്ങൾ കണക്കിലെടുത്തും തൊഴിലാളികളുടെ ജീവിതനിലവാരം മെച്ചപ്പെടുത്തുന്നതിനുമാണ് വേതന വർധന നടപ്പിലാക്കുന്നതെന്ന് സർക്കാർ വാർത്താക്കുറിപ്പിൽ അറിയിച്ചു.
പുതുക്കിയ നിരക്ക് പ്രകാരം 2026 ഏപ്രിൽ 1 മുതൽ കുറഞ്ഞ വേതനം മണിക്കൂറിന് $18.15 ആയി ഉയരും. 2021-ൽ ഫെഡറൽ കുറഞ്ഞ വേതന സംവിധാനം സ്വതന്ത്രമായി നടപ്പിലാക്കിയതിന് ശേഷം ഇതുവരെയുള്ള കണക്കുകൾ പ്രകാരം 21 ശതമാനം വർധനയാണ് രേഖപ്പെടുത്തിയിരിക്കുന്നത്. ഫെഡറൽ ഗവൺമെന്റിന്റെ നിയന്ത്രണത്തിലുള്ള സ്വകാര്യ മേഖലകളിൽ കുറഞ്ഞ വേതനത്തിന് ജോലി ചെയ്യുന്ന ആയിരക്കണക്കിന് തൊഴിലാളികൾക്ക് ഈ തീരുമാനം നേരിട്ട് പ്രയോജനം ചെയ്യും.
