കാനഡയുടെ കുടിയേറ്റ-അഭയാർത്ഥി നിയമങ്ങളിൽ നിർണായക ഭേദഗതികൾ വരുത്തുന്ന ബിൽ C-12 പ്രാബല്യത്തിൽ. 2026 മാർച്ച് 26-നാണ് ഗവർണർ ജനറൽ ബില്ലിൽ ഒപ്പുവെച്ചത്. കുടിയേറ്റ സംവിധാനത്തിലെ പഴുതുകൾ അടയ്ക്കുന്നതിനും അഭയാർത്ഥി അപേക്ഷകളിലെ ക്രമക്കേടുകൾ തടയുന്നതിനുമായി നാല് പ്രധാന മേഖലകളിലാണ് നിയമം മാറ്റങ്ങൾ കൊണ്ടുവരുന്നത്.
പുതിയ നിയമപ്രകാരം അഭയാർത്ഥി അപേക്ഷകൾ നൽകുന്നതിനുള്ള യോഗ്യതാ മാനദണ്ഡങ്ങളിൽ കടുത്ത നിയന്ത്രണങ്ങൾ ഏർപ്പെടുത്തി. കാനഡയിൽ പ്രവേശിച്ച് ഒരു വർഷത്തിന് ശേഷം നൽകുന്ന അപേക്ഷകൾ ഇനി മുതൽ ഇമിഗ്രേഷൻ ആൻഡ് റെഫ്യൂജി ബോർഡിന്റെ (IRB) പരിഗണനയ്ക്ക് അയക്കില്ല. കൂടാതെ, കാനഡ-യുഎസ് അതിർത്തിയിലൂടെ അനധികൃതമായി പ്രവേശിച്ച് 14 ദിവസത്തിന് ശേഷം അപേക്ഷ നൽകുന്നവരെയും പരിഗണിക്കില്ല. അഭയാർത്ഥി സംവിധാനത്തെ കുടിയേറ്റത്തിനുള്ള എളുപ്പവഴിയായി ഉപയോഗിക്കുന്നത് തടയാനാണ് ഈ നീക്കമെന്ന് ഇമിഗ്രേഷൻ വകുപ്പ് വ്യക്തമാക്കി.
അപേക്ഷകരുടെ വിവരങ്ങൾ വിവിധ ഗവൺമെന്റ് വകുപ്പുകൾക്കിടയിൽ സുരക്ഷിതമായി പങ്കുവെക്കാനും വ്യാജരേഖകൾ കണ്ടെത്തിയാൽ വീസകളും വർക്ക് പെർമിറ്റുകളും കൂട്ടത്തോടെ റദ്ദാക്കാനും സർക്കാരിന് ഇനി പുതിയ നിയമം അധികാരം നൽകുന്നു. അപേക്ഷാ നടപടികൾ പൂർണ്ണമായും ഓൺലൈൻ വഴിയാക്കി ലഘൂകരിക്കുന്നതിനൊപ്പം, കാനഡയിൽ നേരിട്ട് ഹാജരുള്ളവരുടെ അപേക്ഷകൾ മാത്രമേ ഇനി മുതൽ പരിഗണിക്കുകയുള്ളൂ. പൊതുതാൽപ്പര്യം മുൻനിർത്തി അപേക്ഷകൾ സ്വീകരിക്കുന്നത് താൽക്കാലികമായി നിർത്തിവെക്കാനും സർക്കാരിന് സാധിക്കും.
