കാനഡയിലെത്തുന്ന പേരന്റസിനും ഗ്രാന്ഡ് പേരന്റസിനും വേണ്ടിയുള്ള സൂപ്പര് വിസ (Super Visa) അപേക്ഷകളിലെ വരുമാന നിബന്ധനകളില് നിര്ണ്ണായക മാറ്റങ്ങള് വരുത്തി ഇമിഗ്രേഷന്, റെഫ്യൂജീസ് ആന്ഡ് സിറ്റിസണ്ഷിപ്പ് കാനഡ (IRCC). പുതിയ മാറ്റങ്ങള് മാര്ച്ച് 31 മുതല് പ്രാബല്യത്തില് വരും. കുടുംബങ്ങളെ ഒന്നിപ്പിക്കുന്നതിനോടൊപ്പം തന്നെ ഇമിഗ്രേഷന് സംവിധാനത്തെ കൂടുതല് സുസ്ഥിരമാക്കുക എന്ന ലക്ഷ്യത്തോടെയാണ് പുതിയ നീക്കമെന്ന് ഐആർസിസി അറിയിച്ചു.
പ്രധാന മാറ്റങ്ങള് ഇതാ :
വരുമാന പരിശോധന കാലയളവ് നീട്ടി: മുന്പ് അപേക്ഷ നല്കുന്നതിന് തൊട്ടുമുമ്പത്തെ ഒരു വര്ഷത്തെ വരുമാനം മാത്രമാണ് കണക്കിലെടുത്തിരുന്നത്. എന്നാല് ഇനി മുതല് അപേക്ഷയ്ക്ക് മുന്പുള്ള രണ്ട് വര്ഷങ്ങളിലെ ഏതെങ്കിലും ഒരു വര്ഷം നിശ്ചിത വരുമാനം ഉണ്ടായാലും അപേക്ഷകര്ക്ക് യോഗ്യത ലഭിക്കും.
സന്ദര്ശകരുടെ വരുമാനവും ഉള്പ്പെടുത്താം: കാനഡയിലുള്ള സ്പോണ്സര്ക്ക് (മക്കള്ക്കോ പേരക്കുട്ടികള്ക്കോ) ആവശ്യമായ വരുമാനത്തിന്റെ നിശ്ചിത ശതമാനം ഉണ്ടെങ്കില്, ബാക്കി തുകയ്ക്കായി സന്ദര്ശകരായ മാതാപിതാക്കളുടെയോ മുത്തശ്ശിമാരുടെയോ വരുമാനം കൂടി കണക്കിലെടുക്കാന് അനുവാദമുണ്ടാകും.
മാര്ച്ച് 31-നോ അതിനു ശേഷമോ സമര്പ്പിക്കുന്ന അപേക്ഷകള്ക്കും നിലവില് പ്രോസസിംഗിലുള്ള അപേക്ഷകള്ക്കും പുതിയ നിയമം ബാധകമായിരിക്കും. കുടുംബാംഗങ്ങളുടെ എണ്ണത്തിനനുസരിച്ചുള്ള വരുമാന രേഖകള് കൃത്യമായി സമര്പ്പിക്കേണ്ടതുണ്ടെന്നും അധികൃതര് വ്യക്തമാക്കി.
കനേഡിയന് പൗരന്മാരുടെയോ സ്ഥിര താമസക്കാരുടെയോ പേരന്റസിനും ഗ്രാന്ഡ് പേരന്റസിനും വേണ്ടി രൂപകല്പ്പന ചെയ്തിട്ടുള്ള മള്ട്ടിപ്പിള് എന്ട്രി വിസയാണ് കനേഡിയന് സൂപ്പര് വിസ. സൂപ്പര് വിസ ലഭിക്കാന് ചില യോഗ്യതാ മാനദണ്ഡങ്ങള് പാലിക്കണം. സൂപ്പര് വിസയ്ക്ക് അപേക്ഷിക്കുന്നവര് കനേഡിയന് പൗരനോ കാനഡയിലെ സ്ഥിര താമസക്കാരനോ ആയ വ്യക്തിയുടെ പേരന്റസോ ഗ്രാന്ഡ് പേരന്റസോ ആയിരിക്കണം. കൂടാതെ സൂപ്പര് വിസ ലഭിക്കുന്നതിന് കാനഡയില് നിന്നുള്ള നിങ്ങളുടെ കുട്ടിയുടെയോ പേരക്കുട്ടിയുടെയോ ഇന്വിറ്റേഷന് ലെറ്റര് ആവശ്യമാണ്. ഈ കത്തില് കാനഡയിലെ നിങ്ങളുടെ താമസ കാലയാളവില് സാമ്പത്തിക പിന്തുണ ഉറപ്പ് നല്കണം. വീട്ടിലെ കുടുംബാംഗങ്ങളുടെ എണ്ണവും അവരുടെ പേരുകളും കത്തില് ഉണ്ടായിരിക്കണം. ഇന്വിറ്റേഷന് നല്കുന്ന വ്യക്തിയുടെ കനേഡിയന് പൗരത്വത്തിന്റെയോ സ്ഥിര താമസത്തിന്റെയോ തെളിവിന്റെ ഫോട്ടോകോപ്പിയും അപേക്ഷയുടെ കൂടെ സമര്പ്പിക്കണം.
