ജനജീവിതം കൂടുതൽ ദുസ്സഹമാക്കി കാനഡയിൽ ഇന്ധനവില വർധന തുടർക്കഥയാകുന്നു. ഇറാൻ സംഘർഷം തുടരുന്ന സാഹചര്യത്തിൽ വാരാന്ത്യത്തിൽ പെട്രോൾ വില ലിറ്ററിന് 1.91 ഡോളർ വരെ ഉയരുമെന്ന് പെട്രോളിയം അനലിസ്റ്റ് ഡാൻ മക്ടീഗ് അറിയിച്ചു. ഇറാനെതിരായ യുഎസ്-ഇസ്രയേൽ യുദ്ധം ലോകത്തെ എണ്ണ വിതരണത്തെ ബാധിച്ചതോടെ സംഘർഷം ആരംഭിച്ചതിനുശേഷം പെട്രോൾ വില വില ലിറ്ററിന് 20 മുതൽ 24 സെൻ്റ് വരെ വർധിച്ചിട്ടുണ്ട്. കൂടാതെ ഡീസൽ വില ലിറ്ററിന് ഏകദേശം 50 സെൻ്റ് വർധനയും രേഖപ്പെടുത്തി.
അതേസമയം ഇന്ധനവില വർധനയുടെ ആഘാതം ഭക്ഷ്യവിലയിൽ അടക്കം ജനങ്ങൾ നേരിടേണ്ടിവരുമെന്ന് പറയുന്നു. ഞായറാഴ്ചയോടെ ഇന്ധനവിലയിൽ 10 മുതൽ 15% വരെ വർധന ഇനിയും ഉണ്ടായേക്കുമെന്നും അദ്ദേഹം പ്രവചിക്കുന്നു. ഇന്ധനവില ട്രക്കിങ് മേഖലയെ ബാധിക്കുന്നതോടെ ഗ്രോസറി ഉൽപ്പന്നങ്ങളുടെ വിലയിൽ പ്രതിഫലിക്കും. ഒപ്പം ഉൽപ്പാദന മേഖലയിലും കാർഷിക മേഖലയിലും ഇന്ധനവില വർധന നേരിട്ട് ബാധിക്കുമെന്നും ഡാൻ മക്ടീഗ് മുന്നറിയിപ്പ് നൽകി.
