തുടര്‍ച്ചയായി രണ്ടാം ദിവസവും എക്‌സ്പ്രസ് എന്‍ട്രി നറുക്കെടുപ്പ് നടത്തി ഇമിഗ്രേഷന്‍, റെഫ്യൂജീസ് ആന്‍ഡ് സിറ്റിസണ്‍ഷിപ്പ് കാനഡ (IRCC). മൂന്ന് മാസത്തിന് ശേഷം നടന്ന ആദ്യ കനേഡിയന്‍ എക്‌സ്പീരിയന്‍സ് ക്ലാസ് (CEC) നറുക്കെടുപ്പില്‍ 500 അപേക്ഷകര്‍ക്ക് ഇമിഗ്രേഷന്‍ വകുപ്പ് ഇന്‍വിറ്റേഷന്‍ നല്‍കി. 547 എന്ന കുറഞ്ഞ കോംപ്രിഹെന്‍സീവ് റാങ്കിംഗ് സിസ്റ്റം (CRS) സ്‌കോര്‍ ഉള്ള അപേക്ഷകരെയാണ് ഈ നറുക്കെടുപ്പില്‍ ഐആര്‍സിസി പരിഗണിച്ചത്.

ഇന്നത്തെ എക്സ്പ്രസ് എന്‍ട്രി നറുക്കെടുപ്പ് മെയ് മാസത്തിലെ നാലാമത്തെ നറുക്കെടുപ്പായിരുന്നു. രണ്ട് കാറ്റഗറി അടിസ്ഥാനമാക്കിയുള്ള നറുക്കെടുപ്പുകളും (ആരോഗ്യ സംരക്ഷണ, വിദ്യാഭ്യാസ വിഭാഗങ്ങള്‍ക്ക് കീഴില്‍) എക്സ്പ്രസ് എന്‍ട്രി പൂളിലെ പ്രൊവിന്‍ഷ്യല്‍ നോമിനി പ്രോഗ്രാം (പിഎന്‍പി) ഉദ്യോഗാര്‍ത്ഥികള്‍ക്കുള്ള ഒരു നറുക്കെടുപ്പും ഇതില്‍ ഉള്‍പ്പെടുന്നു. ഈ വര്‍ഷം ഇതുവരെ, എക്സ്പ്രസ് എന്‍ട്രി നറുക്കെടുപ്പിലൂടെ 34,440 അപേക്ഷകര്‍ക്ക് ഐആര്‍സിസി ഇന്‍വിറ്റേഷന്‍ നല്‍കിയിട്ടുണ്ട്.