കാനഡയിൽ അതിശൈത്യത്തിന് സാധ്യതയെന്ന് റിപ്പോർട്ട്. ഈ മാസം കാനഡയിൽ അസാധാരണമാംവിധം കഠിനമായ തണുപ്പ് അനുഭവപ്പെടുമെന്നാണ് റിപ്പോർട്ടുകളുള്ളത്. പല പ്രദേശങ്ങളിലും ഈ വർഷത്തെ സാധാരണ താപനിലയേക്കാൾ വളരെ കുറവായതുകൊണ്ടാണ് ഈ തണുപ്പിനെ “അതിരൂക്ഷം” എന്ന് വിശേഷിപ്പിക്കുന്നത്. അമേരിക്കൻ കാലാവസ്ഥാ ശാസ്ത്രജ്ഞനായ ജൂഡാ കോഹൻ, ആർട്ടിഫിഷ്യൽ ഇൻ്റലിജൻസ് ഉപയോഗിച്ച് നടത്തിയ പഠനത്തിൽ, ഈ മാസം ഭൂമിയിൽ ഏറ്റവും കൂടുതൽ തണുപ്പ് അനുഭവപ്പെടുന്ന അതിശൈത്യ മേഖലകളിലൊന്ന് കനേഡിയൻ പ്രേരിസ് മുതൽ യു.എസിൻ്റെ ചില ഭാഗങ്ങൾ വരെയാണെന്ന് കണ്ടെത്തി. “അതിരൂക്ഷം” എന്നത് ഗ്രഹത്തിലെ ഏറ്റവും കുറഞ്ഞ താപനിലയല്ല, മറിച്ച് സാധാരണ സാഹചര്യങ്ങളെ അപേക്ഷിച്ച് അസാധാരണ താപനിലയെയാണ് സൂചിപ്പിക്കുന്നതെന്നും അദ്ദേഹം വ്യക്തമാക്കി.
ഈ കഠിനമായ തണുപ്പ് ആദ്യം പടിഞ്ഞാറൻ കാനഡയിലും തുടർന്ന് കിഴക്കൻ ഭാഗങ്ങളിലേക്കും യു.എസിലേക്കും വ്യാപിക്കും. പോളാർ വെർട്ടക്സിന് തടസ്സമുണ്ടായാൽ വളരെ തണുപ്പുള്ള ആർട്ടിക് കാറ്റ് തെക്കോട്ട് കാനഡ, വടക്കൻ യു.എസ്, യൂറോപ്പ്, ഏഷ്യയുടെ ചില ഭാഗങ്ങൾ എന്നിവിടങ്ങളിലേക്ക് എത്താൻ കാരണമാകുമെന്നും അദ്ദേഹം വിശദീകരിച്ചു.
ജനുവരി അവസാനത്തിലോ ഫെബ്രുവരി ആദ്യത്തിലോ സാധാരണയായി കാണുന്ന കഠിനമായ ആർട്ടിക് കാറ്റ് ഈ വർഷം ആഴ്ചകൾക്ക് മുൻപേ എത്തിയിരിക്കുന്നു എന്ന് എൻവയോൺമെൻ്റ് കാനഡയിലെ സീനിയർ കാലാവസ്ഥാ ശാസ്ത്രജ്ഞൻ ഡേവ് ഫിലിപ്സ് പറഞ്ഞു. അലാസ്കയിൽ നിന്നും യൂക്കോണിൽ നിന്നും വീശിയടിക്കുന്ന ഈ കഠിനമായ തണുപ്പ് കാനഡയ്ക്ക് മുകളിൽ നിലനിൽക്കുമെന്നും, ഹ്രസ്വകാലത്തേക്ക് വലിയ ആശ്വാസമോ താപനില ഉയരുകയോ ചെയ്യില്ലെന്നും ഫിലിപ്സ് മുന്നറിയിപ്പ് നൽകി. ഫ്രോസ്റ്റ്ബൈറ്റ്, ഹൈപ്പോതെർമിയ (ശരീരതാപം അപകടകരമാംവിധം കുറയുന്നത്) എന്നിവ വലിയ അപകടസാധ്യതകളാണെന്നുംഅദ്ദേഹം പറഞ്ഞു.
ഡിസംബറിലെ ബാക്കി ദിവസങ്ങളിൽ കാനഡയുടെ ഭൂരിഭാഗം പ്രദേശങ്ങളിലും സാധാരണയിൽ താഴെയുള്ള താപനില പ്രതീക്ഷിക്കാം. ജനുവരിയിലും ഫെബ്രുവരിയിലും കൂടുതൽ തണുപ്പ് തരംഗങ്ങൾ ഉണ്ടാകാനും സാധ്യതയുണ്ട്. സസ്കറ്റൂൺ, വിന്നിപെഗ്, ഒട്ടാവ, ക്യൂബെക്ക് സിറ്റി തുടങ്ങിയ നഗരങ്ങളിൽ വരും ആഴ്ചകളിൽ പതിവിലും കഠിനമായ തണുപ്പ് അനുഭവപ്പെടാൻ സാധ്യതയുണ്ട്. പല പ്രദേശങ്ങളിലും ഇതിനകം മഞ്ഞുവീഴ്ച, കാറ്റ്, മഞ്ഞുകാറ്റ് എന്നിവയ്ക്ക് മുന്നറിയിപ്പ് നൽകിയിട്ടുണ്ട്.
