ഒട്ടാവ: അന്താരാഷ്ട്ര വിദ്യാർത്ഥികൾക്കായി ഏർപ്പെടുത്തിയ നിയന്ത്രണങ്ങൾ കാനഡയുടെ വിദ്യാഭ്യാസ മേഖലയെ പ്രതിസന്ധിയിലാക്കുന്നതായി റിപ്പോർട്ട്. വിദേശ വിദ്യാർത്ഥികളുടെ പെർമിറ്റുകളിൽ ഏർപ്പെടുത്തിയ പരിധി പ്രതീക്ഷിച്ചതിനേക്കാൾ വലിയ തോതിൽ വിദ്യാർത്ഥികളുടെ എണ്ണം കുറയാൻ കാരണമായെന്ന് ഓഡിറ്റർ ജനറൽ കാരെൻ ഹോഗൻ പുറത്തുവിട്ട റിപ്പോർട്ടിൽ പറയുന്നു. ഇത് വിദ്യാഭ്യാസ സ്ഥാപനങ്ങളുടെ വരുമാനത്തെ ബാധിക്കുക മാത്രമല്ല, ആഗോളതലത്തിൽ ഉന്നത വിദ്യാഭ്യാസത്തിനുള്ള മികച്ച ഇടമെന്ന കാനഡയുടെ കീർത്തിക്ക് മങ്ങലേൽപ്പിക്കുകയും ചെയ്തതായി പ്രമുഖ സർവകലാശാലകളും കോളേജുകളും പ്രതികരിച്ചു.

വാർത്താ റിപ്പോർട്ടുകൾ പ്രകാരം, ഒന്റാറിയോയിലെ പെർത്ത് പോലുള്ള ചെറിയ നഗരങ്ങളിലെ ക്യാംപസുകൾ അടച്ചുപൂട്ടലിന്റെ വക്കിലാണ്. അൽഗോൺക്വിൻ കോളേജ് തങ്ങളുടെ പെർത്ത് ക്യാംപസ് ഈ ഓഗസ്റ്റിൽ അടച്ചുപൂട്ടാൻ തീരുമാനിച്ചു. വിദേശ വിദ്യാർത്ഥികളുടെ കുറവും അതുമൂലമുണ്ടായ സാമ്പത്തിക പ്രതിസന്ധിയുമാണ് ഇതിന് കാരണമായി ചൂണ്ടിക്കാട്ടുന്നത്. സസ്‌കാച്ചവൻ സർവകലാശാലയിലും വിദേശ വിദ്യാർത്ഥികളുടെ എണ്ണത്തിൽ 18 ശതമാനത്തോളം കുറവുണ്ടായി. അൽബർട്ടയിൽ പെർമിറ്റ് അപ്രൂവലുകളിൽ 65 ശതമാനം വരെ ഇടിവാണ് രേഖപ്പെടുത്തിയത്. ഇത് വിദ്യാഭ്യാസ സ്ഥാപനങ്ങളുടെ ബജറ്റുകളെ താളംതെറ്റിക്കുകയും ജീവനക്കാരെ പിരിച്ചുവിടുന്നതുൾപ്പെടെയുള്ള നടപടികളിലേക്ക് നയിക്കുകയും ചെയ്തു.

വിദേശ വിദ്യാർത്ഥികളെ വെറും വരുമാന മാർഗ്ഗമായി മാത്രം കണ്ട വിദ്യാഭ്യാസ സ്ഥാപനങ്ങളുടെ നിലപാടാണ് ഈ തകർച്ചയ്ക്ക് കാരണമെന്ന് ചില വിദ്യാർത്ഥികൾ വിമർശിക്കുന്നു. വിദ്യാർത്ഥികളെ ചൂഷണം ചെയ്താണ് സ്ഥാപനങ്ങൾ ലാഭമുണ്ടാക്കിയതെന്നും ഇപ്പോൾ നിയമങ്ങൾ മാറിയപ്പോൾ അവർ പ്രതിസന്ധിയിലായെന്നുമാണ് ഇവരുടെ വാദം. അതേസമയം, കുടിയേറ്റ നിയമങ്ങളിലെ അനിശ്ചിതത്വം കാരണം പല വിദ്യാർത്ഥികളും മറ്റ് രാജ്യങ്ങളെ ആശ്രയിക്കാൻ തുടങ്ങിയത് കാനഡയുടെ ‘ബ്രാൻഡ് ഇമേജിനെ’ ബാധിച്ചുവെന്ന് ലെത്ത്ബ്രിഡ്ജ് പോളിടെക്നിക് അധികൃതർ പറഞ്ഞു. ഇന്ത്യയുൾപ്പെടെയുള്ള രാജ്യങ്ങളിൽ നിന്നുള്ള വിദ്യാർത്ഥികളുടെ താല്പര്യം തിരികെ കൊണ്ടുവരാൻ നിയമങ്ങളിൽ വ്യക്തതയും സ്ഥിരതയും ആവശ്യമാണെന്ന് യൂണിവേഴ്സിറ്റീസ് കാനഡ തലവൻ ഗബ്രിയേൽ മില്ലർ അഭിപ്രായപ്പെട്ടു.

ഓഡിറ്റർ ജനറലിന്റെ റിപ്പോർട്ടിനോട് പ്രതികരിച്ച കുടിയേറ്റ കാര്യ മന്ത്രി ലെന മെറ്റ്‌ലെജ് ഡിയാബ്, പോരായ്മകൾ പരിഹരിക്കുമെന്നും സിസ്റ്റത്തിന്റെ വിശ്വാസ്യത വീണ്ടെടുക്കാൻ നടപടികൾ സ്വീകരിക്കുമെന്നും അറിയിച്ചു. യഥാർത്ഥ വിദ്യാർത്ഥികളെ സംരക്ഷിക്കുന്നതിനും കമ്മ്യൂണിറ്റികളെ പിന്തുണയ്ക്കുന്നതിനുമായിരിക്കും മുൻഗണനയെന്ന് അവർ വ്യക്തമാക്കി. വരും വർഷങ്ങളിൽ വിദ്യാഭ്യാസ മേഖലയിലെ ഈ സാമ്പത്തിക പ്രതിസന്ധി മറികടക്കാൻ സർക്കാർ വിപുലമായ പദ്ധതികൾ ആവിഷ്കരിക്കേണ്ടി വരും. പ്രവിശ്യകൾ തമ്മിലുള്ള വരുമാന വ്യത്യാസവും ഈ നിയന്ത്രണങ്ങൾ വർദ്ധിപ്പിച്ചതായി റിപ്പോർട്ട് ചൂണ്ടിക്കാട്ടുന്നു.