ഓട്ടവ: ഫെഡറൽ ജോലി സ്ഥലങ്ങളിൽ തൊഴിൽ ചെയ്യാൻ ഏറ്റവും മോശം സ്ഥാപനങ്ങൾ കാനഡ ബോർഡർ സർവീസസ് ഏജൻസിയും കനേഡിയൻ സെക്യൂരിറ്റി ഇന്റലിജൻസ് സർവീസസുമാണെന്ന് സർവേ റിപ്പോർട്ട്. കാനഡ ബോർഡർ സർവീസസ് ഏജൻസിയിലെയും കനേഡിയൻ സെക്യൂരിറ്റി ഇന്റലിജൻസ് സർവീസിലെയും ജീവനക്കാർ അവരുടെ ഓഫീസുകൾ ജോലി ചെയ്യാൻ മികച്ച സ്ഥലമായി ശുപാർശ ചെയ്യുന്നില്ലെന്ന് ഫെഡറൽ പബ്ലിക് സർവീസ് സർവേ സൂചിപ്പിക്കുന്നു. 2024ലെ പബ്ലിക് സർവീസ് എപ്ലോയി സർവേയിൽ ഫെഡറൽ സർക്കാർ ജീവനക്കാരോട് ജോലി സ്ഥലത്തെ സംതൃപ്തി സംബന്ധിച്ച് ചോദ്യങ്ങൾ ചോദിച്ചു. ഇതിൽ നേതൃത്വം, ക്ഷേമം, കോംപൻസേഷൻ എന്നിവ ഉൾപ്പെടുന്നു.
സിബിഎസ്എ, ഇന്ത്യൻ ഓയിൽ, ഗ്യാസ് കാനഡ എന്നിവ ഏറ്റവും മോശം സ്ഥാനത്ത് ഇടം നേടി. ഈ സ്ഥാപനങ്ങളിൽ നിന്നുള്ള 46 ശതമാനം ആളുകൾ മാത്രം ജോലി ചെയ്യാൻ അനുയോജ്യമായ സ്ഥലങ്ങളാണെന്ന് അഭിപ്രായപ്പെട്ടു. കനേഡിയൻ സെക്യൂരിറ്റി ഇന്റലിജൻസ് സർവീസിലെ 48 ശതമാനം ആളുകളും കാനഡ ഓഡിറ്റർ ജനറൽ ഓഫീസിലെ 49 ശതമാനം ആളുകളും തങ്ങളുടെ ജോലി സ്ഥലം ജോലി ചെയ്യാൻ മികച്ച സ്ഥലമായി ശുപാർശ ചെയ്യുമെന്ന് പറഞ്ഞു.
ഒരു ജീവനക്കാരന്റെ അനുഭവ സമ്പത്തിനെ സ്വാധീനിക്കുന്ന നിരവധി ഘടകങ്ങളുണ്ടെന്ന് സിബിഎസ്എ വക്താവ് ജാക്വിലിൻ റോബി പറഞ്ഞു. സുരക്ഷിതമായ ജോലി സ്ഥലം, ജീവനക്കാരുടെ ക്ഷേമം, എല്ലാത്തരം പീഡനങ്ങളിൽ നിന്നും മുക്തമായ അന്തരീക്ഷത്തിൽ ജോലി ചെയ്യാനുള്ള അവരുടെ അവകാശം എന്നിവ സ്വാധീനിക്കുന്നു.
വർക്ക്-ലൈഫ് ബാലൻസ്, ജോലിയിൽ നിന്നുള്ള സംതൃപ്തി, പരിശ്രമങ്ങൾക്കുള്ള അംഗീകാരം തുടങ്ങി നിരവധി മേഖലകളിൽ സിബിഎസ്എ ജീവനക്കാർ മൊത്തത്തിൽ പൊതുസേവനത്തേക്കാൾ മോശമായി അനുഭവിക്കുന്നുണ്ടെന്ന് സർവേ സൂചിപ്പിക്കുന്നു. 2024 ഒക്ടോബർ 28 മുതൽ ഡിസംബർ 31 വരെ നടന്ന സർവേയിൽ 93 ഫെഡറൽ വകുപ്പുകളിലെയും ഏജൻസികളിലെയും 1,86,000 ത്തിലധികം ജീവനക്കാർ പങ്കെടുത്തു. 50.5 ശതമാനം പ്രതികരണ നിരക്കാണ് ലഭിച്ചത്.
