എഡ്മിന്റന്: ആല്ബര്ട്ടയില് കാട്ടുതീ സീസണിന് തുടക്കമായതോടെ മോണിറ്ററിങ് സിസ്റ്റത്തിലേക്ക് ധനസഹായം പ്രഖ്യാപിച്ച് പ്രവിശ്യാ സര്ക്കാര്. 150 കാലാവസ്ഥാ കേന്ദ്രങ്ങളുടെ ശൃംഖല നവീകരിക്കുന്നതിനും വികസിപ്പിക്കുന്നതിനുമായാണ് 9 ലക്ഷം ഡോളര് അനുവദിച്ചത്. ഇതോടെ തീപിടിത്ത സാഹചര്യങ്ങള് കൃത്യമായി പ്രവചിക്കാന് സാധിക്കുമെന്ന് ആല്ബര്ട്ട വൈല്ഡ് ഫയര് ഉദ്യോഗസ്ഥര് പറഞ്ഞു.
താപനില, ഈര്പ്പം, കാറ്റ്, തുടങ്ങിയ പാരിസ്ഥിതിക സാഹചര്യങ്ങള് ഈ സ്റ്റേഷനുകള് തത്സമയം നിരീക്ഷിക്കുന്നു. കൂടാതെ സീസണിന്റെ തുടക്കത്തില് ആല്ബര്ട്ടയിലെ തീപിടിത്ത സാധ്യതാ സൂചകങ്ങളായ മഞ്ഞുപാളികളുടെ അളവ് നിരീക്ഷിക്കാനും മോണിറ്ററുകള്ക്ക് കഴിയുമെന്ന് പ്രവിശ്യാ വൈല്ഡ്ഫയര് ഇന്ഫര്മേഷന് യൂണിറ്റ് മാനേജര് ക്രിസ്റ്റി ടക്കര് പറഞ്ഞു.
ഈ വര്ഷം ഇതുവരെ പ്രവിശ്യയിലുടനീളം 10 കാട്ടുതീ ഉണ്ടായിട്ടുണ്ട് . എന്നാല്, കഴിഞ്ഞ വര്ഷത്തെ അപേക്ഷിച്ച് കാട്ടുതീയുടെ എണ്ണം കുറഞ്ഞിട്ടുണ്ട്. കഴിഞ്ഞ വര്ഷം ഇതേ സമയത്ത് അറുപതോളം കാട്ടുതീയാണ് റിപ്പോര്ട്ട് ചെയ്തത്.
