ഉപയോക്താക്കൾ ആന്ത്രോപ്പിക്കിന്റെ ക്ലോഡ് എഐ ചാറ്റ്ബോട്ടുമായി നടത്തുന്ന സ്വകാര്യ സംഭാഷണങ്ങൾ ഗൂഗിൾ സെർച്ച് ഫലങ്ങളിൽ കാണപ്പെട്ടത് വലിയ ആശങ്കയ്ക്ക് വഴിവെച്ചിരിക്കുകയാണ്. ക്രിപ്റ്റോ കറൻസി വാലറ്റ് കീകൾ, വ്യക്തിഗത വിവരങ്ങൾ തുടങ്ങിയ സുപ്രധാന ഡാറ്റകൾ ഇത്തരത്തിൽ പരസ്യമായതായി റെഡ്ഡിറ്റ് ഉപയോക്താക്കൾ ചൂണ്ടിക്കാണിച്ചു. ഫോർച്യൂൺ മാസികയാണ് ഈ സുരക്ഷാ പ്രശ്നം ആദ്യമായി പുറംലോകത്തെ അറിയിച്ചത്. തൊഴിൽ, ആരോഗ്യം, നിയമപരമായ വിഷയങ്ങൾ എന്നിവയിൽ ഉപദേശം തേടാൻ എഐ ചാറ്റ്ബോട്ടുകളെ ആശ്രയിക്കുന്ന ഉപയോക്താക്കളെ സംബന്ധിച്ചിടത്തോളം ഇത് വലിയൊരു സുരക്ഷാ ഭീഷണിയാണ്.
എഐ സംഭാഷണങ്ങൾ മറ്റുള്ളവരുമായി പങ്കുവെക്കാൻ സഹായിക്കുന്ന ക്ലോഡിന്റെ ‘ഷെയർ (Share)’ ഫീച്ചറാണ് ഈ വിവരച്ചോർച്ചയ്ക്ക് കാരണമെന്നാണ് പ്രാഥമിക നിഗമനം. ഉപയോക്താക്കൾ തങ്ങളുടെ ചാറ്റ് ലിങ്കുകൾ മറ്റുള്ളവർക്ക് അയച്ചുനൽകുമ്പോൾ, മൂന്നാം കക്ഷി വെബ്‌സൈറ്റുകൾ വഴി ഈ ലിങ്കുകൾ ഗൂഗിൾ പോലുള്ള സെർച്ച് എഞ്ചിനുകൾ ഇൻഡക്സ് ചെയ്യാനുള്ള സാധ്യതയുണ്ട്. എന്നാൽ ഉപയോക്താക്കളുടെ ചാറ്റുകൾ സെർച്ച് എഞ്ചിനുകൾക്ക് നേരിട്ട് കണ്ടെത്താനാകില്ലെന്നും, സെർച്ച് എഞ്ചിനുകൾക്ക് ഡയറക്ടറികളോ സൈറ്റ്മാപ്പുകളോ നൽകുന്നില്ലെന്നും കമ്പനി വ്യക്തമാക്കിയിട്ടുണ്ട്.
ഈ സംഭവം എഐ സാങ്കേതികവിദ്യ രംഗത്ത് പ്രവർത്തിക്കുന്ന എല്ലാ മുൻനിര കമ്പനികൾക്കും മുന്നറിയിപ്പാണ്. ആന്ത്രോപിക്, ഓപ്പൺഎഐ, xAI തുടങ്ങിയ വൻകിട കമ്പനികളെയെല്ലാം ഒരുപോലെ ബാധിക്കുന്ന ഒന്നാണ് ഉപയോക്താക്കളുടെ ഡാറ്റാ സുരക്ഷ. ഉപയോക്താക്കൾ പങ്കുവെക്കുന്ന ലിങ്കുകൾ വഴി വിവരങ്ങൾ ചോരുന്നത് തടയാനും സ്വകാര്യത ഉറപ്പാക്കാനും ശാശ്വതമായ സാങ്കേതിക പരിഹാരങ്ങൾ കണ്ടെത്തുക എന്നത് എഐ കമ്പനികൾക്ക് വരുംനാളുകളിൽ വലിയൊരു വെല്ലുവിളിയായിരിക്കും.
