ബ്രിട്ടീഷ് കൊളംബിയൻ തീരത്ത് ചാർട്ടർ ബോട്ട് മുങ്ങി ആറ് പേരെ കാണാതായി. നാല് പേരെ രക്ഷപെടുത്തിയതായി കനേഡിയൻ കോസ്റ്റ് ഗാർഡ് അറിയിച്ചു. വാൻകൂവർ വിമാനത്താവളത്തിന് തെക്കുപടിഞ്ഞാറ് റോബർട്ട്സ് ബാങ്കിന് സമീപം ഞായറാഴ്ച 11:45 ഓടെയാണ് അപകടം ഉണ്ടായത്. ബാക്കിയുള്ള ആറ് പേർക്കായുള്ള തിരച്ചിൽ തുടരുകയാണെന്നും അപകടകാരണം വ്യക്തമല്ലെന്നും അധികൃതർ അറിയിച്ചു.

അപകടസമയത്ത് ബോട്ടിൽ 10 പേരുണ്ടായിരുന്നതായി ബി.സി. ആർ.സി.എം.പി റിപ്പോർട്ട് ചെയ്തു. ലൈഫ് ജാക്കറ്റ് ഇല്ലാതെ നിരവധി ആളുകൾ വെള്ളത്തിൽ കിടക്കുന്നതായി മറ്റൊരു ബോട്ടിലെ ആളുകൾ നൽകിയ വിവരത്തിന്‍റെ അടിസ്ഥാനത്തിലാണ് തിരച്ചിൽ ആരംഭിച്ചത്. കോസ്റ്റ് ഗാർഡ് ഹോവർക്രാഫ്റ്റ്, ഹെലികോപ്റ്ററുകൾ, ആർ.സി.എം.പി ബോട്ടുകൾ എന്നിവയ്ക്ക് പുറമെ ബി.സി ഫെറീസിന്‍റെ രണ്ട് കപ്പലുകളും സിവിലിയൻ ബോട്ടുകളും തിരച്ചിലിൽ പങ്കെടുത്തു.