ടൊറന്റോ: കടുത്ത ചൂടിനെത്തുടർന്ന് ടൊറന്റോയിലും പരിസര പ്രദേശങ്ങളിലും ജാഗ്രതാ നിർദ്ദേശം പുറപ്പെടുവിച്ച് എൻവയൺമെന്റ് കാനഡ. അന്തരീക്ഷത്തിലെ ഉയർന്ന ഹ്യുമിഡിറ്റി മൂലം ടൊറന്റോയിൽ ഇന്ന് 35 ഡിഗ്രി സെൽഷ്യസ് ചൂട് അനുഭവപ്പെടാൻ സാധ്യതയുണ്ടെന്ന് അധികൃതർ അറിയിച്ചു. ചൊവ്വാഴ്ച രാത്രി വരെ ഇത് നീണ്ടുനിൽക്കും. മിസ്സിസാഗ, ബ്രാംപ്റ്റൺ, ഹാമിൽട്ടൺ ഉൾപ്പെടെയുള്ള ജി.ടി.എച്ച്.എ (GTHA) മേഖലകളിലും വിൻഡ്‌സർ വരെയുള്ള പടിഞ്ഞാറൻ പ്രദേശങ്ങളിലും യെല്ലോ അലേർട്ട് പ്രഖ്യാപിച്ചിട്ടുണ്ട്. ബുധനാഴ്ചയോടെ താപനില 16 ഡിഗ്രി സെൽഷ്യസിലേക്ക് താഴ്ന്ന് ചൂടിന് ശമനമുണ്ടാകും.
കടുത്ത ചൂടിനെ പ്രതിരോധിക്കാൻ ടൊറന്റോ നഗരസഭ അടിയന്തര ‘ഹീറ്റ് റിലീഫ്’ പദ്ധതികൾ ആവിഷ്കരിച്ചിട്ടുണ്ട്. പൊതുജനങ്ങൾക്ക് ചൂടിൽ നിന്ന് രക്ഷ നേടാനായി നഗരത്തിലെ വിവിധ പാർക്കുകളിലായി 380-ലധികം വാട്ടർ ഫൗണ്ടനുകളും 247 പൊതു ശൗചാലയങ്ങളും സജ്ജമാക്കിയിട്ടുണ്ട്. കൂടാതെ നേഥൻ ഫിലിപ്സ് സ്ക്വയർ, മെൽ ലാസ്റ്റ്മാൻ സ്ക്വയർ, ഈസ്റ്റ് യോർക്ക് സിവിക് സെന്റർ, എറ്റോബികോക്ക് സിവിക് സെന്റർ എന്നിവിടങ്ങളിൽ ഇന്ന് ഉച്ചയോടെ മൊബൈൽ വാട്ടർ ട്രെയിലറുകൾ ലഭ്യമാക്കുമെന്നും നഗരസഭ അറിയിച്ചു. ദാഹം തോന്നിയില്ലെങ്കിൽ പോലും ഇടയ്ക്കിടെ വെള്ളം കുടിച്ച് ശരീരം തണുപ്പിക്കാൻ ആരോഗ്യ വിദഗ്ദ്ധർ പൊതുജനങ്ങളോട് ആവശ്യപ്പെട്ടിട്ടുണ്ട്.
