ക്രിമിനൽ പശ്ചാത്തലമുള്ള വ്യക്തികൾക്ക് പൗരത്വം നൽകുകയോ നിഷേധിക്കുകയോ ചെയ്തതിനെക്കുറിച്ചുള്ള വിവരങ്ങൾ കാനഡയുടെ ഇമിഗ്രേഷൻ ബ്യൂറോക്രസിയുടെ പക്കലില്ലെന്ന് ലിബറൽ സർക്കാരിന്റെ വെളിപ്പെടുത്തൽ. ഡാറ്റ പരിമിതികൾ കാരണം, ക്രിമിനൽ റെക്കോർഡുള്ള എത്ര അപേക്ഷകൾ ലഭിച്ചു, അംഗീകരിച്ചു, നിരസിച്ചു എന്ന് രേഖപ്പെടുത്താൻ കഴിഞ്ഞില്ലെന്ന് ഹൗസ് ഓഫ് കോമൺസിൽ ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) അറിയിച്ചു. കുറ്റകൃത്യങ്ങളുടെ പേരിൽ ഒരാൾക്ക് പൗരത്വം നിഷേധിക്കാൻ ‘പൗരത്വ നിയമം’അനുവാദം നൽകുന്നുണ്ട്. കള്ളം പറയുകയോ രേഖകൾ മറച്ചുവെക്കുകയോ ചെയ്യുന്നത് ഉൾപ്പെടെയുള്ള മറ്റ് കാരണങ്ങൾകൊണ്ടും പൗരത്വം നിഷേധിക്കപ്പെടാം. യുദ്ധക്കുറ്റങ്ങൾ ഉൾപ്പെടെ കാനഡയ്ക്ക് പുറത്തുള്ള കുറ്റകൃത്യങ്ങളിൽ പങ്കെടുത്തവർക്കും പൗരത്വം നിഷേധിക്കപ്പെടാം.
ഇത്തരം സുപ്രധാന വിവരങ്ങൾ ഇമിഗ്രേഷൻ വകുപ്പിൻ്റെ കൈവശമില്ലാത്തതിൽ കൺസർവേറ്റീവ് കുടിയേറ്റ നിരീക്ഷക കൂടിയായ റെംപെൽ ഗാർണറെപ്പോലുള്ള നേതാക്കൾ കടുത്ത ആശങ്ക രേഖപ്പെടുത്തി. കഴിഞ്ഞ വർഷം, അഹമ്മദ് ഫൗദ് മുസ്തഫ എൽഡിഡിയെ ഐഎസ്ഐഎസ് ഭീകരാക്രമണ ഗൂഢാലോചനയുമായി ബന്ധപ്പെട്ട് അറസ്റ്റിലാകുന്നതിന് തൊട്ടുമുമ്പ് കനേഡിയൻ പൗരത്വം നേടിയിരുന്നു. ഫ്രഞ്ച് ഇന്റലിജൻസ് ഏജൻസികളിൽ നിന്നാണ് ഈ ഭീഷണിയെക്കുറിച്ച് കാനഡ അറിഞ്ഞത്.
