കാനഡയിൽ വ്യാപകമായുണ്ടായ കാട്ടുതീയിൽ നിന്നുള്ള പുക പടർന്നതോടെ പരാതിയുമായി വിസ്കോൺസെൻ, മിനസോട, നോർത്ത് ഡെക്കോഡ എന്നിവിടങ്ങളിൽ നിന്നുള്ള റിപ്പബ്ലിക്കൻ നിയമസഭാംഗങ്ങൾ. യുഎസ് പരിസ്ഥിതി സംരക്ഷണ ഏജൻസിക്കും ഇന്റർനാഷണൽ ജോയിന്റ് കമ്മീഷനും പരാതി നൽകിയതായി വിസ്കോൺസെൻ പ്രതിനിധി കാൽവിൻ കാലഹൻ അറിയിച്ചു.
കാട്ടുതീ നിയന്ത്രിക്കാൻ കഴിഞ്ഞില്ലെങ്കിൽ കാനഡ പ്രത്യാഘാതങ്ങൾ നേരിടേണ്ടിവരുമെന്ന് കാൽവിൻ കാലഹൻ പറഞ്ഞു. കനേഡിയൻ ഉദ്യോഗസ്ഥരിൽ നിന്ന് കൂടുതൽ ശക്തമായ വന പരിപാലന നയങ്ങളും ഉത്തരവാദിത്തവും ആവശ്യപ്പെട്ട് മിഷിഗൺ പ്രതിനിധി ജാക്ക് ബെർഗ്മാൻ തിങ്കളാഴ്ച കനേഡിയൻ സെനറ്റർ മൈക്കൽ മക്ഡോണൾഡിന് കത്ത് അയച്ചിരുന്നു. അതേസമയം മിഷിഗൺ പ്രതിനിധി ജോൺ ജെയിംസും ഇതുസംബന്ധിച്ച് കഴിഞ്ഞ ആഴ്ച പ്രധാനമന്ത്രി മാർക്ക് കാർണിക്ക് കത്തയച്ചിരുന്നു.
