കാനഡയിൽ ഏറ്റവും സന്തോഷമുള്ള പ്രവിശ്യ ക്യുബെക്കെന്ന് സർവേ റിപ്പോർട്ട്. കാനഡയിലെ 40,000 ത്തോളം പേരെ ഉൾപ്പെടുത്തി ലെഗർ നടത്തിയ സർവേയിൽ ക്യുബെക്കിലെ ആളുകളാണ് ഏറ്റവും സന്തോഷവാന്മാരെന്ന് കണ്ടെത്തി. ക്യുബെക്ക് നിവാസികൾ സൂചികയിൽ 100 ൽ ശരാശരി 72.4 സന്തോഷം അനുഭവിക്കുന്നതായി റിപ്പോർട്ട് ചെയ്യുന്നു. ഇത് ദേശീയ ശരാശരിയായ 68.7 നേക്കാൾ കൂടുതലാണ്.
70.2 സ്‌കോറുമായി ന്യൂബ്രൺസ്‌വിക്ക് ക്യുബെക്കിന് പിന്നിൽ രണ്ടാമതെത്തി. രാജ്യത്തെ വലിയ 10 നഗരങ്ങളിൽ മിസിസാഗയ്ക്കാണ് ഏറ്റവും കൂടുതൽ സന്തോഷ സൂചികയുള്ളത്. മോൺട്രിയലാണ് രണ്ടാം സ്ഥാനത്ത്. ടൊറന്റോ പട്ടികയിൽ ഏറ്റവും അവസാനമാണ്.
കഴിഞ്ഞ ഒരു വർഷത്തിനിടെ 49 ശതമാനം പേരുടെ സന്തോഷത്തിൽ മാറ്റമില്ലെന്നും 23 ശതമാനം പേർക്ക് സന്തോഷം കൂടിയെന്നും 28 ശതമാനം പേർക്ക് കുറഞ്ഞുവെന്നും സർവേ വ്യക്തമാക്കുന്നു. 18 നും 34 നും ഇടയിലുള്ള യുവജന വിഭാഗങ്ങളിൽ സന്തോഷം വർധിച്ചതായാണ് റിപ്പോർട്ട്. അതേസമയം, 35 നും 54 നും ഇടയിലുള്ള മധ്യവയസ്‌കരിൽ സന്തോഷം കുറഞ്ഞതായി റിപ്പോർട്ടിൽ പറയുന്നു.
