കാല്‍ഗറി: ആല്‍ബര്‍ട്ട മെഷീന്‍ ഇന്റലിജന്‍സ് ഇന്‍സ്റ്റിറ്റ്യൂട്ടിന് (Amii) 50 ലക്ഷം ഡോളര്‍ ഗ്രാന്റ് പ്രഖ്യാപിച്ച് ഗൂഗിള്‍. കനേഡിയന്‍ പോസ്റ്റ്-സെക്കന്‍ഡറി വിദ്യാര്‍ത്ഥികള്‍ക്ക് ആര്‍ട്ടിഫിഷ്യല്‍ ഇന്റലിജന്‍സിനെ (AI) കുറിച്ച് കൂടുതല്‍ പഠിക്കാനും ഭാവിയിലെ ജോലികള്‍ക്കായി വിദ്യാര്‍ത്ഥികളെ സജ്ജമാക്കുന്നതിന്റെയും ഭാഗമായാണ് നിക്ഷേപം. ആല്‍ബര്‍ട്ടയുടെ തലസ്ഥാനത്ത് നടന്നു കൊണ്ടിരിക്കുന്ന AI കോണ്‍ഫ്രന്‍സായ അപ്പര്‍ ബൗണ്ടിലാണ് പ്രഖ്യാപനം നടത്തിയത്.

കാനഡയിലുടനീളം 25 പോസ്റ്റ്-സെക്കന്‍ഡറി സ്‌കൂളുകളുടെ ദേശീയ കണ്‍സോര്‍ഷ്യം സ്ഥാപിക്കുന്നതിനായി Amii ഈ ഫണ്ടിങ് ഉപയോഗിക്കും. ഇതുവഴി AI പാഠ്യപദ്ധതി സാമഗ്രികള്‍ വികസിപ്പിക്കുകയും ഏകദേശം 125,000 വിദ്യാര്‍ത്ഥികളിലേക്ക് ഇത് എത്തിച്ചേരുകയും ചെയ്യും.

ആര്‍ട്ടിഫിഷ്യല്‍ ഇന്റലിജന്‍സില്‍ കാനഡ പിന്നിലാണെന്നും ഈ നിക്ഷേപം ആ വിടവ് നികത്താന്‍ സഹായിക്കുമെന്നും ഗൂഗിള്‍ പറയുന്നു. ഗൂഗിളിന്റെ അനുബന്ധ സ്ഥാപനമായ ഡീപ് മൈന്‍ഡ് എഡ്മിന്റനിലെ ഓഫീസ് അടച്ചുപൂട്ടി ഏകദേശം രണ്ട് വര്‍ഷത്തിന് ശേഷമാണ് ഈ ധനസഹായം പ്രഖ്യാപിക്കുന്നത്.