ഒൻ്റാരിയോ സർക്കാരിൻ്റെ കർശനമായ മാനദണ്ഡങ്ങൾ പാലിക്കുന്നതിൽ പരാജയപ്പെട്ടതിനെ തുടർന്ന് ടൊറൻ്റോയിലെ 28 ഡ്രൈവിംഗ് സ്കൂളുകളുടെ ലൈസൻസ് ഗതാഗത മന്ത്രാലയം റദ്ദാക്കി. പ്രവിശ്യയിലുടനീളം ആകെ 66 സ്കൂളുകൾക്കെതിരെയാണ് നടപടി സ്വീകരിച്ചിരിക്കുന്നത്. സർക്കാർ നിശ്ചയിച്ചിട്ടുള്ള പരിശീലന രീതികളും സുരക്ഷാ മാനദണ്ഡങ്ങളും പിന്തുടരാത്ത സ്ഥാപനങ്ങൾക്കെതിരെയാണ് ഈ നടപടി. 2025-ൽ മാത്രം മൂന്ന് സ്കൂളുകൾക്ക് പുതിയതായി ലൈസൻസ് നഷ്ടമായപ്പോൾ, പട്ടികയിലുള്ള മറ്റ് സ്കൂളുകൾ വിവിധ കാലയളവുകളിലായി നിയമലംഘനത്തിന് പിടിക്കപ്പെട്ടവയാണ്.
ഡ്രൈവിംഗ് സ്കൂളുകളിൽ മന്ത്രാലയം നടത്തുന്ന പതിവ് ഓഡിറ്റുകളുടെയും പരിശോധനകളുടെയും ഭാഗമായാണ് ഈ നടപടി. ശരിയായ പരിശീലനം നൽകാതെ സർട്ടിഫിക്കറ്റുകൾ വിതരണം ചെയ്യുകയോ നിയമവിരുദ്ധമായ രീതികൾ അവലംബിക്കുകയോ ചെയ്യുന്ന സ്കൂളുകൾക്കെതിരെ ‘സീറോ ടോളറൻസ്’ നയമാണ് സർക്കാർ സ്വീകരിക്കുന്നതെന്ന് അധികൃതർ വ്യക്തമാക്കി. ഡ്രൈവിംഗ് പഠിക്കാൻ ആഗ്രഹിക്കുന്നവർ സർക്കാരിൻ്റെ ഔദ്യോഗിക വെബ്സൈറ്റ് സന്ദർശിച്ച് അംഗീകൃത സ്കൂളുകളുടെ പട്ടിക പരിശോധിക്കണമെന്നും, പണമടയ്ക്കുമ്പോൾ രസീതുകൾ ചോദിച്ചു വാങ്ങണമെന്നും മന്ത്രാലയം മുന്നറിയിപ്പ് നൽകി. റോഡ് സുരക്ഷ ഉറപ്പാക്കുന്നതിൻ്റെ ഭാഗമായി വരും ദിവസങ്ങളിലും പരിശോധനകൾ തുടരുമെന്ന് മന്ത്രാലയം അറിയിച്ചു.
