ഹൂസ്റ്റൺ: അമേരിക്കയിലെ ടെക്സസ് സംസ്ഥാനത്തെ ഹൂസ്റ്റണിലും പരിസരപ്രദേശങ്ങളിലുമുള്ള കുറവിലങ്ങാട് മലയാളികൾ ഒത്തുചേർന്ന് രൂപം നൽകിയിട്ടുള്ള കുറവിലങ്ങാട് അസോസിയേഷൻ ഓഫ് ഗ്രേറ്റർ ഹൂസ്റ്റൺ എന്ന സംഘടനയുടെ ഉദ്ഘാടനം 26ന് വൈകുന്നേരം 4.30ന് നടത്തപ്പെടും.
ഗ്രേറ്റർ ഹൂസ്റ്റൺ സ്റ്റാഫോഡിലുള്ള കേരളാ ഹൗസിൽ നടക്കുന്ന പരിപാടിയിൽ ഡിസ്ട്രിക്ട് ജഡ്ജ് സുരേന്ദ്രൻ പട്ടേൽ ഉദ്ഘാടനം നിർവഹിക്കുന്നതും സ്റ്റാഫോഡ് സിറ്റി മേയർ കെൻ മാത്യു ലോഗോ പ്രകാശനം നടത്തുന്നതുമാണ്.
ഫാ. ജോസഫ് പൊറ്റമ്മേൽ ആശംസകൾ അർപ്പിക്കുന്ന ചടങ്ങിൽ കുറവിലങ്ങാട്ടെ കലാ-സാംസ്‌കാരിക നേതാക്കളുടെ ആശംസാ വിഡിയോ പ്രദർശനവും ഉണ്ടായിരിക്കുന്നതാണ്. ഉദ്ഘാടന ചടങ്ങിൽ നാട്ടുകാരെ കാണുവാനും പരിചയങ്ങൾ പുതുക്കുവാനുമുള്ള അവസരത്തിനൊപ്പം വിവിധ കലാപരിപാടികളും ഡിന്നറും ഒരുക്കിയിട്ടുണ്ടെന്ന് പ്രസിഡന്റ് ഷാജി ചിറത്തടം അറിയിച്ചു.
